ភ្នំពេញ៖ គម្រោងវិនិយោគសាងសង់ និងអាជីវដកម្មសណ្ឋាគារផ្កាយ៥ ចំនួន២ ត្រូវបានក្រុមប្រឹក្សាអភិវឌ្ឍន៍កម្ពុជាអនុម័តអនុញ្ញាតឱ្យសាងសង់ក្នុងខេត្តព្រះសីហនុ។ គម្រោងទាំងពីរនេះមានតម្លៃប្រមាណជាង ៣៣២លានដុល្លារអាមេរិក។

បើតាមក្រុមប្រឹក្សាអភិវឌ្ឍន៍កម្ពុជាសណ្ឋាគារមួយត្រូវបានសាងសង់ និងវិនិយោគដោយក្រុមហ៊ុន HUAN HAI BO LAI INTERNATIONAL INVESTMENT ដែលមានចំនួន ៩៥៧បន្ទប់ ក្នុងដើមទុន ១៦៨លានដុល្លារអាមេរិក និងអាចបង្កើតការងារបានចំនួន ៩៥៥កន្លែង។ ចំណែកសណ្ឋាគារមួយទៀតត្រូវបានសាងសង់និងវិនិយោគដោយក្រុមហ៊ុន MARITIME CITY CO., LTD ដែលមានតម្លៃប្រមាណ ១៦៤,៤លានដុល្លារអាមេរិក និងបង្កើតការងារបានចំនួន ១ ៤៥៥កន្លែង។

ក្រៅពីនេះក៏មានការអនុញ្ញាតឱ្យសាងសង់រោងចក្រចំនួន ៤បន្ថែមក្នុងខេត្តព្រះសីហនុផងដែររួមមាន រោងចក្រផលិតទុយោប្លាស្ទិកគ្រឿងតំណបំពង់ទីបជ័រគ្រប់ប្រភេទ និងគ្រឿងបន្ទាប់បន្សំ រោងចក្រផលិតភួយ និងរោងចក្រផលិតសម្ភារៈវេចខ្ចប់គ្រប់ប្រភេទ ដែលសរុបមានតម្លៃជាង ៧,៥លានដុល្លារ ដែលអាចបង្កើតការងារបានចំនួន ២៥០កន្លែងផងដែរ៕